TYDELIKE ADVIESRAAD

ZUID-AFRIKAANSCHE BOER REPUBLIEKE

 Aan: RSA Regering, Alle Bewegings, Groeperings en alle inwoners van SA.

Onderwerp: Openbare Kennisgewing

Die ZABR se Standpunt oor die “Oranjevrijstaat Boervolk” se mediaverklarings.

Op 7 November 2025 het die Oranjevrijstaat Boervolk (OVB) ’n kennisgewing in die Staatskoerant (No. 51500) geplaas en in die media bekend gemaak waarin hulle eis om as ’n soewereine volk erken te word en herbesit te neem van die ampte van staatspresident, waarnemende staatspresident van die Oranje-Vrystaat en Oranjerivierstaat-Volksraad, asook ampte in uitvoerende gesag.

As daar na bogenoemde gekyk word, is dit wat die ZABR ook ten doel het (soewereiniteit en selfbeskikking van die Boervolk), met hierdie wesentlike verskille:

1. dat die ZABR al die 21+ historiese Boer Republieke verteenwoordig, nie slegs een van die republieke nie;
2. die proses wat gevolg word;
3. die beginsels waarop dit geïmplementeer word.

 Wat word hiermee bedoel en hoe benader die ZABR hierdie herstelproses?

1. Die ZABR se mandaat is verkry vanuit al die historiese Boer Republieke regoor Suid-Afrika, met die doel om een kollektiewe administrasie daar te stel om die Boervolk in totaliteit soewerein en onafhanklik tot selfbeskikking te administreer. Wanneer die Boervolk daardie punt bereik, kan die volk self besluit watter vorm van administrasie (konfederaal of andersins) die beste sal dien.
2. Die proses wat deur die OVB gevolg word, is wat ons almal graag sou wou sien gebeur, maar die realiteite is nie so eenvoudig nie. Die volgende risiko’s is deeglik deur die ZABR ondersoek en is die rede waarom ons nie hierdie roete ondersteun nie:
   1. Al word die RSA-regering as de facto beskou, word dit steeds as de jure erken, plaaslik en internasionaal, en het die mag in sy hand; of sy wette erken word of nie, dit word afgedwing.
   2. Die RSA Grondwet maak geen voorsiening vir twee de jure regerings binne die grondgebied van Suid-Afrika nie. Enige aanduiding van ’n parallelle regering word as hoogverraad beskou (Grondwet Artikel 41(1), POCDATRA Act 33/2004).
   3. Enige wetgewing wat buite die RSA-regering geproklameer word, word as ondermyning van die Grondwet beskou en kan as hoogverraad vervolg word.
   4. Enige verklaring wat die huidige regering se status direk uitdaag, kan as ’n bedreiging vir die stabiliteit van die land geïnterpreteer word en lei tot ernstige regtelike gevolge.
3. Die beginsels waarop die ZABR bou, word as volg uiteengesit:
   1. Die ZABR se mandaat is nie ’n gewone groepering nie, maar ’n Boervolk-volks- en kulturele beweging, gevorm vanuit die beginsels en behoeftes van die Zuid-Afrikaansche Boervolk (ZAB).
   2. Die ZABR spits hom toe op die toepassing van die ZAB se reg tot onafhanklikheid en selfbeskikking as ’n soewereine volk, en lei die volk daartoe.
   3. Die ZABR beroep hom op die beginsels van internasionale volkereg, op die Boervolk se unieke kulturele erfenis en op die erkende status as ’n volk. ’n Volk se kultuur bepaal nie haar geloof nie, maar haar geloof bepaal haar kultuur. Dus vorm haar geloof die kern van haar kultuur, wat dus die volk self bepaal, asook haar administrasie.
   4. Die ZABR beroep hom op die bestaansreg waarop ons voorgeslagte as Boervolk ontstaan het: hul vertroue en geloof in hul Skepper, die Almagtige Hemelse Vader en Sy Woord.
   5. Die ZABR beroep hom op die Skriftuurlike beginsel en die terme van die Geloftes waaraan die Boervolk en ons as nageslag, vir altyd, gebind is.
   6. Die ZABR beroep hom dus op die beginsels wat deur die Almagtige Hemelse Vader self neergelê is, bevestig deur Sy Seun en gelei deur Sy Gees, soos opgeteken in Sy volledige Woord.
   7. Die ZABR en die ZAB pleit daarom by niemand anders as by haar Almagtige Skepper en by haar volksgenote wat in hierdie beginsels eenheid vind nie. Ons buig ons knieë slegs voor Hom, om weer vir Hom ’n volk te wees.

Slotverklaring:

Met bogenoemde in ag geneem, alhoewel die einddoel van ’n soewereine Boervolk wat oor haarself beskik ook nagestreef word deur die ZABR, distansieer die ZABR hom uitdruklik van die proses en beginsels wat deur die Oranjevrijstaat Boervolk gevolg word. Die OVB, geïnisieer deur Tom en Wim Rossouw (voormalige lede van die ZABR en Tydelike Adviesraad), was van die begin af vasbeslote om slegs die Vrystaat se onafhanklikheid te eis en het die ZABR se teokratiese grondslag (Bylaag L - Volgens Bybelse Beginsels asook Bylaag M - Beginsels van Kulturele en Individuele Beskerming van die konsep ZABR Grondwet) en vredeliewende wit vlag-proses heeltemal verwerp. Dit het veroorsaak dat alle verbintenisse met die ZABR verbreek is.

Die ZABR waarsku elke volksgenoot om uiters versigtig te wees. Die OVB se aggressiewe benadering kan maklik ontaard in ’n situasie waar die volk weer die prys betaal (kruitvat-lont-vonk-GEVOLGE). As die Boervolk weer vir haar Skepper ’n volk wil wees, moet Hy en Sy Woord ook in haar administrasie erken word!

Die ZABR spits hom toe op die voorbereiding van “die ark” – ’n teokratiese-sosialistiese, Bybels-gegronde kulturele struktuur – sodat, wanneer die tyd kom wat Oom Siener gesien het, wanneer die Boervolk een in geloof sal staan, die ZABR die volk kan administreer: daar sal ‘n Boervolk opstaan (vlag wapper) wanneer alles eers in duie gestort het en ons deur die vuuroond is wat die kaf wegbrand en die wat oorbly, een in geloof sal wees.

Geteken

Tydelike Adviesraad (TAR) Zuid-Afrikaansche Boer Republieke

[email protected]      www.zabboervolk.com

23 November 2025