TYDELIKE ADVIESRAAD

ZUID-AFRIKAANSCHE BOER REPUBLIEKE

 Aan: Alle Bewegings, Groeperings en blanke inwoners in SA.

Onderwerp: SAMEWERKING

Daar word gereeld gevra, en die stelling word dikwels gemaak, dat al die verskillende aksies wat deur al die verskillende bewegings en groeperings onderneem word om ‘die volk’ se posisie te verbeter, bymekaar moet kom en saam moet begin werk. Dit klink alles goed en wel, maar dink net vir een oomblik: glo u werklik dat daar nog nie pogings was om te verenig nie? Daar wás al verskeie pogings in die verlede – met min, indien enige, sukses.

Die rede waarom daar so baie verskillende bewegings bestaan, is eintlik voor die hand liggend: elkeen het ander sterktes, motiewe en prioriteite. Maak dit die een beter of belangriker as die ander, of sommige onnodig? Beslis nie! Dat daar soveel verskillende groeperings is, is ook nie noodwendig ’n probleem nie – dit wys eerder hoe groot en ernstig die behoefte is.

Dit is ook ’n feit dat nie almal se bedoelings en agenda is wat hulle voorgee nie. Die Boervolk is al so dikwels mislei en vertrap dat ons sy van nature agterdogtig geword het – en tereg, want die geskiedenis is vol lesse. Daar is diegene wat met hul eie agendas verhoed dat ander se doelwitte bereik word, of wat met alle mag en krag keer dat die Boervolk tot haar reg kom, al gee hulle anders voor. Misleiding deur nie-volksgenote is iets waarmee ons almal maar alte bekend is.

Dan is daar groeperings of bewegings wat nie noodwendig op die identiteit en kultuur van ’n spesifieke volk fokus nie, maar eerder op die breër spektrum van blankes in Suid-Afrika. Groeperings wat hulleself “’n volk” noem, maar nie aan die kenmerke van ’n ware volk kan voldoen nie.

Daar is groeperings of bewegings wat byvoorbeeld weer op veiligheid en weerbaarheid fokus, en so meer. Dit is duidelik dat elke groepering op hul eie sterk punte konsentreer en dikwels dieselfde uiteindelike doelwitte het. Dit vorm ‘n samelewing.

Buiten die verskillende fokusgebiede; wat verhinder dat selfs groeperings wat op dieselfde aspek werk, om saam te werk? BEGINSELS! Die HOE en WAAROM agter wat hulle doen. In Engels sê hulle: “like-minded, like-valued people” – mense met dieselfde beginsels en dieselfde waardes. Waar dié twee ooreenstem, maak dit nie saak op watter gebied elkeen fokus nie; hulle kán en sál saamwerk in ‘n samelewing. Soos in die weermag: verskillende eenhede ondersteun mekaar perfek omdat die beginsels en waardes uit dieselfde handboek geneem is. Die probleem lê dus nie by die verskillende groeperings of bewegings nie, maar eerder by die verskillende beginsels en waardes wat moet ooreenstem.

Waar plaas dit die Zuid-Afrikaansche Boer Republieke (ZABR) en die Zuid-Afrikaansche Boervolk (ZAB) teenoor hierdie “110” groeperings en bewegings met betrekking tot haar waardes en beginsels?

1. 1. Die ZABR se mandaat is nie ’n gewone groepering nie, maar ’n Boervolk-volks- en kulturele beweging, gevorm vanuit die beginsels en behoeftes van die Zuid-Afrikaansche Boervolk (ZAB).
   2. Die ZABR spits hom toe op die toepassing van die ZAB se reg tot onafhanklikheid en selfbeskikking as ’n soewereine volk, en lei die volk daartoe.
   3. Die ZABR beroep hom op die beginsels van internasionale volkereg, op die Boervolk se unieke kulturele erfenis en op die erkende status as ’n volk. ’n Volk se kultuur bepaal nie haar geloof nie, maar haar geloof bepaal haar kultuur. Dus vorm haar geloof die kern van haar kultuur, wat dus die volk self bepaal, asook haar administrasie.
   4. Die ZABR beroep hom op die bestaansreg waarop ons voorgeslagte as Boervolk ontstaan het: hul vertroue en geloof in hul Skepper, die Almagtige Hemelse Vader en Sy Woord.
   5. Die ZABR beroep hom op die Skriftuurlike beginsel en die terme van die Geloftes waaraan die Boervolk en ons as nageslag, vir altyd, gebind is.
   6. Die ZABR beroep hom dus op die beginsels wat deur die Almagtige Hemelse Vader self neergelê is, bevestig deur Sy Seun en gelei deur Sy Gees, soos opgeteken in Sy volledige Woord.
   7. Die ZABR pleit daarom by niemand anders as by haar Almagtige Skepper en by haar volksgenote wat in hierdie beginsels eenheid vind nie. Ons buig ons knieë slegs voor Hom, om weer vir Hom ’n volk te wees.

Laat dit dus aan almal en aan die “110” bewegings en groeperings daar buite duidelik bekend wees: indien julle julself met hierdie beginsels en waardes vereenselwig, tree gerus met ons in verbinding sodat ons saam die pad vorentoe kan beplan – elkeen op sy eie terrein en met sy eie unieke sterk punte wat ‘n samelewing vorm.

Laat dit ook duidelik wees: Die ZAB sal eerder sonder grond en getalle vir ons Almagtige Hemelse Vader lewe as sonder Vader met getalle vir die grond. Baie van die “110 bewegings” plaas egter grond en vryheid bo die erkenning van die Skepper. Die ZAB en ZABR plaas haar Skepper EERSTE en ons wil weer VIR HOM ’n volk wees!

Vriendelike Boer groete

ZABR Tydelike Adviesraad